Një burrë në Staten Island të Nju Jorkut ishte rrugës për në një takim te dentisti , kur rrufeja e goditi në këmbë, vetëm pak hapa larg shtëpisë së tij. Momenti i tmerrshëm, i filmuar nga kamera e ziles së shtëpisë, tashmë është bërë viral në rrjetet sociale. Sipas NBC News, Thomas Fahmy tha se po ecte rreth 5 deri në 8 metra larg makinës së tij, kur papritur u godit nga rrufeja gjatë një stuhie.
Pamjet e kamerës së sigurisë tregojnë Fahmyn duke u rrëzuar përtokë pas goditjes. Ai tha se ndjeu një goditje shumë të fuqishme që u përhap në të gjithë trupin, e ndjekur nga ndjesi shpimi gjilpërash, mpirje, dhimbje dhe një ndjesi djegieje.
“Është një ndjesi shumë e fortë djegieje. Shpim gjilpërash, mpirje, dhimbje, dhimbje të forta në të dyja këmbët”, tha Fahmy.
Pavarësisht fuqisë së goditjes, Fahmy nuk e humbi vetëdijen. Në video shihet teksa ngrihet përsëri në këmbë dhe ecën drejt një shtëpie aty pranë për të kërkuar ndihmë.
“Dëgjova: ‘Më ndihmoni, më ndihmoni’, kështu që vrapova te dera dhe e pashë të shtrirë përtokë”, tha fqinja Stephanie Homan.
Fahmy u dërgua më pas në Northwell Staten Island University Hospital, ku u mbajt nën vëzhgim gjatë natës dhe u lirua të nesërmen. Çuditërisht, mjekët nuk gjetën as djegie dhe as lëndime të rënda.
Fahmy tha se kjo përvojë e bëri jashtëzakonisht mirënjohës që ishte gjallë. Si një njeri me besim fetar, ai shkoi në kishë të dielën për të falënderuar Zotin që mbijetoi.
Ngjarja e ka bërë gjithashtu të reflektojë mbi jetën.
Doorbell camera captures dramatic moments when a New York man is struck by lightning pic.twitter.com/QJ4lTyiSkQ
— Interesting things (@awkwardgoogle) September 2, 2026
“Thjesht ta vlerësoni jetën, të buzëqeshni dhe të merrni herë pas here ajër të pastër dhe të mos lejoni që jeta t’ju pushtojë”, tha Fahmy.
Të shtunën, ai bleu edhe një biletë lotarie Mega Millions, duke bërë shaka se kjo ishte një tjetër kthesë në një javë tashmë të jashtëzakonshme.
Fahmy punon në zyrën e përfaqësueses amerikane Nicole Malliotakis në Staten Island. Kongresmenia publikoi të hënën një deklaratë ku shprehu lehtësim që ai mbijetoi nga ky incident të pazakontë dhe potencialisht fatal.
Rasti i tij vjen në një kohë kur në SHBA janë raportuar disa raste të tjera të njerëzve të goditur nga rrufeja, përfshirë edhe raste fatale.
Një baba në Florida humbi jetën pasi u godit nga rrufeja teksa po bënte ski jet, ndërsa një nënë dhe fëmija i saj i vogël u goditën nga rrufeja teksa po ecnin në trotuar në Margate. Në Illinois, një nënë dhe djali i saj pësuan djegie të rënda pasi u goditën nga rrufeja gjatë një kampingu pranë Liqenit.
Sipas Qendrave Amerikane për Kontrollin dhe Parandalimin e Sëmundjeve (CDC), rreth 37 milionë rrufe godasin tokën në SHBA çdo vit. Megjithatë, mundësia që një individ të goditet nga rrufeja është më pak se një në një milion, ndërsa gati 90 për qind e personave që goditen mbijetojnë.
