Sot në Kosovë na pret mot i vranët dhe me reshje të herëpashershme shiu. Pasdite lokalisht priten rrebeshe shiu, ndërsa temperatura maksimale pritet të arrijë deri në 15 gradë Celsius.
Reshje shiu sot priten edhe në Shqipëri, Mal të Zi dhe perëndim të Maqedonisë së Veriut. Në viset tjera të Maqedonisë reshjet do të jenë të pakta dhe të lokalizuara. Reshje shiu nesër priten edhe në Luginën e Preshevës sidomos në orët e mëngjesit dhe vonë në mbrëmje.
Temperaturat do të shënojnë ulje në tërë rajonin për shkak të “karakterit” të ftohtë të erërave juglindore dhe jugore.
Të premtën në Kosovë pritet të jetë pak më ngrohtë dhe me intervale kohore me diell. Megjithatë, gjatë ditës ose pasdite parashihen zhvillime të fuqishme të disa sistemeve me vranësira konvektive që do të kushtëzojnë rrebeshe lokalisht të fuqishme shiu me vetëtima dhe bubullimë.
Reshje lokale shiu të premtën pritet të ketë edhe në Shqipëri dhe Mal të Zi, ndërsa në Maqedoninë Veriore reshjet parashihet të jenë më të pakta, megjithatë në disa vise mund të ketë rrebeshe intensive. Në Luginë rrebeshe priten vonë pasdite ose në mbrëmje.
Për fundjavë na pret mot i ndryshueshëm, me intervale kohore me diell, vranësira dhe reshje lokale shiu. E shtuna më e ngrohtë dhe intervale kohore me diell, ndërsa e diela me më shumë vranësira dhe me reshje të herëpashershme shiu./METEOBALLKAN
