Moti pranveror do të vazhdojë deri në fundjavë në rajonin tonë dhe me afrimin e fundit të javës do të kemi edhe vranësira të shpeshta dhe po ashtu edhe rrebeshe lokale shiu, kurse në fundjavë do të kemi ndryshim të madh në gjendjen sinoptike.
Një front i fuqishëm i ftohtë ajror do të depërtojë së bashku me ajrin e ftohtë dhe kësaj radhe do të kemi “reagimin” e Mesdheut me një ciklogjenezë të fuqishme. Për këtë arsye pritet të kemi reshje më intensive atmosferike, ndërsa temperaturat polare zbresin në Ballkan. Pasi që kemi shumë ditë përpara fundjavës nuk duhet të ngutemi me konkludime për reshje bore, ngase kjo do të varet tërësisht nga pozicionimi i ciklogjenezës mesdhetare dhe sasia e ajrit të ftohtë që vjen në territoret tona.
Shumë i sigurtë është opsioni i reshjeve të borës në shumë vise të Ballkanit sidomos në Bosnjë dhe Hercegovinë dhe Serbi, por mbetet ende pikëpyetje nëse ajri i ftohtë do të depërtojë më thellë në jug për të sjellur reshje bore edhe në Kosovë, viset kontinentale të Shqipërisë dhe Maqedonisë së Veriut. Gjasat janë ideale që të kemi reshje bore edhe në Kosovë, por për këtë duhet të presim, ngase një ndryshim i vogël në parametrat meteorologjik mund të ndryshojë sasinë dhe llojin e reshjeve në territoret tona.
Pra, deri në fundjavë do të kemi mot pranveror, ndërsa rrebeshe lokale shiu mund të presim nga e premtja e shtuna ku ka gjasa që të kemi edhe bubullima, ndërsa të dielën dhe në fillim të javës së re priten reshje më intensive me gjasa që të kemi edhe reshje bore, megjithatë kjo nuk duhet të merret ende me siguri të madhe./MeteoBallkan
