Pas reshjeve intensive të natës së kaluar të shiut dhe të borës si dhe erërave mjaft të fuqishme frontale, atmosfera është qetësuar përkohësisht, megjithatë një tjetër front dhe ciklon po vjen shumë shpejtë.
Shtypja atmosferike po ulet përsëri dhe pritet të ulet dukshëm sidomos gjatë ditës së Premte. Nga Mesdheu do të arrijnë masa të reja të lagështa ajrore së bashku me një front të ngrohtë. Fronti i ngrohtë do të shkaktojë rritje të temperaturave dhe reshje shiu të përcjellura me erëra jugore. Pasditen e vonshme të së premtes nga veriu afrohet një front i ri mjaft i fuqishëm i ftohtë ajror. Reshjet e shiut do të shndërrohen në reshje bore në Republikën e Kosovës ku lokalisht priten reshje të dendura bore.
Erërat e forta natën e kaluar shkaktuan dëme materiale në disa zona të Republikës së Kosovës, por nuk zgjaten shumë. Të Premten mund të kemi përsëritjen e erërave mjaft të fuqishme fillimisht nga jugu dhe pastaj nga veriu.
Gjatë ditës dhe mbrëmjes së Premte priten reshje të konsiderueshme atmosferike në gati të gjitha territoret tona e sidomos në Republikën e Kosovës. Këto reshje jane shumë të mirëpritura dhe po ashtu edhe reshjet e borës për shkak të mungeses së tyre për një kohë shumë të gjatë.
Reshjet të dendura përpos Kosovës priten edhe në pjesë tjera të Ballkanit dhe Evropes dhe në shumë vise do të ketë reshje bore sepse ajri Arktik ka pushtuar një pjesë të mirë të Kontinentit.
Anticikloni i fundjaves
Pas reshjeve të reja që priten të Premten dhe të Shtunën, pas frontit potent që pritet të vjen do të kemi rritjen rapide të presionit atmosferik dhe kjo nënkupton zhvillimin e një mase të fuqishme ajrore anticiklonike që do të stabilizojë motin plotësisht në viset tona.
Pra, nga e diela do të kemi stabilizim të plotë të motit dhe presim mëngjese me acar dhe ditë relativisht të ftohta, por stabile, megjithatë temperaturat do të rriten gradualisht./MeteoBallkan
