Gjatë ditës së sotme masa gjigande ciklonike kanë përfshirë Britaninë e Madhe, ndërsa nesër qendra ciklonike do të jetë në mes të Britanisë së Madhe dhe Skandinavisë.
Ndikimi i këtij super-cikloni do të shtrihet deri në territoret tona, ndërsa erëra të fuqishme priten në veri të Shqipërisë, disa vise të Republikës së Kosovës sidomos në skajin verilindor të Kosovës ku priten erërat më të fuqishme. Erërat do të fuqizohen nga mesdita dhe orëve të pasdites, ndërsa parashihet të dobësohen në mbrëmje dhe gjatë natës.
Presioni atmosferik në qendrën ciklonike do të jetë jashtëzakonisht i ulët dhe me shtrirjen e ndikimit ciklonik në drejtim të territoreve tona do kemi uljen rapide të presionit atmosferik edhe në viset tona dhe pikërisht për këtë arsye dhe normalisht arsye tjera do të kemi erëra të fuqishme.
Këto erëra janë më se normale në raste të tilla të gjendjes sinoptike dhe nuk duhet të kemi kurrfar paniku. Megjithatë kujdesi duhet të jetë në nivele të larta sidomos orëve të pasdites. Erërat më të fuqishme parashihen në viset kodrinore-malore dhe priten të arrijnë shpejtësinë maksimale deri rreth 70, madje edhe 80 km-H . Në raste të rralla shkurtimisht edhe më shumë, por erërat e fuqishme nuk do të jenë prezente në tërë territorin e Republikës së Kosovës.
Reshje shiu nesër priten në Mal të Zi, veri të Shqipërisë dhe Dukagjin në Republikën e Kosovës. Vonë në mbrëmje rrebeshe lokale priten në shumë vise tjera. Gjatë natës qetësim gradual i atmosferës.
Të hënën dhe të Martën na pret mot më i qetë. Priten intervale kohore me diell, por lokalisht pritet edhe ndonjë rigë ose rrebesh shiu.