Gjatë ditës së djeshme cikloni i stacionuar me qendrën e tij mbi Detin Tiren shumë afër Italisë ka shkaktuar destabilizim të fuqishëm të kushteve sinoptike në Itali dhe rrethinë. Rrebeshe të fuqishme shiu të cilat kanë shkaktuar edhe vërshime lokale të përmasave të vogla ka pasur dje në Itali, ndërsa reshje të pakta në Shqipëri, Kosovë dhe Maqedoni.
Në orët e pasdites së vonshme dhe mbrëmjes në Shqipëri pati zhvillime të fuqishme vranësirash të cilat sollën edhe rrebeshe lokale, por të fuqishme shiu me vetëtima dhe bubullimë. Disa nga këto sisteme stuhish kaluan edhe kufirin dhe kapën shumë pjesë të Dukagjinit e më së shumti rajonin e Pejës dhe Istogut. Në rajonin e Pejës edhe në këto çaste ka rrebeshe të fuqishme shiu me vetëtima dhe bubullimë. Përgjegjës për këto jostabilitete është pikërisht ky ciklon në fotografi.
Sot gjatë pasdites rrebeshe lokale shiu me vetëtima dhe bubullimë do të ketë edhe në pjesët tjera të Kosovës, Malit të Zi si dhe në disa pjesë të Maqedonisë së Veriut dhe Shqipërisë./Meteoballkan
