Cikloni shumë i fuqishëm që shkaktoi stuhi bore dhe ulje të ndjeshme të temperaturave është larguar në lindje të Kontinentit dhe tani pason një përmirësim afatshkurtër i motit edhe pse vazhdon fluksi i ajrit të ftohtë polar pas masave ajrore ciklonike. Kulminacioni i të ftohtit polar pritet sonte gjatë natës dhe orëve të hershme të mëngjesit të nesërm.
Masa ajrore anticiklonike erdhi menjëherë pas cikloni, por ende në Kosovë priten reshje të herëpashershme, afatshkurtra bore. Nesër një ciklon i ri nga veriperëndimi i Evropes niset në drejtim të vendeve tona dhe arrin vonë dhe të martën. Ajri i lagësht i ciklonit në fillim mund të ndeshet me ajrin e ftohtë, të mbetur polar dhe për këtë arsye mund të kemi reshje të reja bore, por të cilat shpejt do të shndërrohen në reshje shiu, ngase cikloni i ri që po vjen nuk e ka pozicionimin e duhur për reshje bore, por më shumë për reshje shiu për shkak të ajrit të ngrohtë që sjellë cikloni nga Mesdheu.
Të martën priten reshje shiu, lokalisht të dendura e reshje bore vetëm në viset malore.
Pra, pas një përjetimi të paharrueshëm dimëror, vazhdon moti mjaft dinamik, por me reshje të cilat më shumë do të jenë në formë shiu dhe kjo bazuar në ecuritë aktuale sinoptike të cilat gjithsesi se mund të pësojnë ndryshime./MeteoBallkan
