Të dielën në afërsi të Tunisisë dhe Libisë në Afrikën Veriore do të krijohet një ciklon i zakonshëm i cili pastaj do të rrugëtojë në drejtim të Italisë. Pastaj, nga Italia ky ciklon do të ndikojë në motin mbi Gadishullin Ballkanik.
Siç thamë edhe më herët e diela do të jetë kryesisht ditë stabile tek ne dhe e nxehtë, edhe pse nuk do të mungojnë vranësirat e herëpashershme dhe rigat eventuale kryesisht të dobëta të shiut dikur vonë në mbrëmje ose natën në të hënën. Ky ciklon do të rrugëtojë në drejtim të Detit Tiren afër Italisë dhe pastaj në drejtim të Detit Adriatik do të kemi depërtimin e një fronti të ftohtë ajror i cili do të kushtëzojë krijimin e një cikloni të ri mbi Detin Adriatik. Ky ciklon nga e hëna do të shkaktojë reshje lokalisht të fuqishme shiu që nga Sllovenia, Kroacia, Bosna dhe Hercegovina, Serbia dhe Mali i Zi. Pra e kemi fjalën për ditën e hënë. Vende-vende do të ketë edhe shtrëngata të fuqishme me vetëtima, bubullimë dhe mundësi për breshër.
Ky ciklon pjesërsisht do të ndikojë edhe në Shqipëri, Kosovë dhe Maqedoninë e Veriut, por reshjet tek ne pritet të jenë më të dobëta krahasuar me vendet e rajonit me ndonjë përjashtim.
Cikloni do të vazhdojë të ndikojë në kushtet sinoptike edhe javën tjetër mbi Gadishullin Ballkanik, ndërsa priten edhe periudha me mot të mirë herë pas here, por në përgjithësi do të vazhdojë trendi i motit jostabil.
Këto ishin të dhëna të përgjithshme, ndërsa ne do tju mbajmë të informuar për detajet me postimet tona të përditshme. Në fund të themi se këtë fundjavë tek ne pritet mot kryesisht i këndshëm dhe stabil me ndonjë përjashtim të vogël, prandaj shfrytëzojeni./Meteoballkan
