Cikloni i shtresave të larta që është shkëputur dhe pozicionuar në Itali është më së përgjegjës për atmosferën jashtëzakonisht jo-stabile në Ballkan. Së bashku me temperaturat e larta afrikane u krijuan stuhi të fuqishme shiu e breshëri masiv.
“Shkëputja ciklonike” tani do të fillojë të lëvizë nga Italia përmes Ballkanit duke përfshirë edhe territoret tona në drejtim të Detit të Zi dhe faktikisht për këtë arsye priten reshje edhe më intensive në viset tona, prandaj të enjten priten rrebeshe dhe shtrëngata të reja në Kosovë dhe Maqedoninë Veriore, por edhe në shumë pjesë të Shqipërisë dhe Luginës së Preshevës. Stuhitë më të mëdha priten në territorin e Kosovës dhe Maqedonisë së Veriut, të paktën sipas parashikimeve të modeleve globale kompjuterike për parashikim të motit.
Stuhi të Enjten priten edhe në Shqipëri, madje edhe në viset bregdetare por nuk do të zgjasin aq shumë.
Stuhitë intensive do të jenë të karakterit lokal, por mund të ndodhë krijimi i ndonjë stuhie multicelulare që do të kap territore më të mëdha me reshje intensive dhe vetëtima e bubullimë. Edhe dita e Premte parashihet me reshje sidomos në Kosovë. Cikloni do të tërheqë sasi pak më të madhe të ajrit të freskët së bashku me frontin e ftohtë nga Evropa qendrore dhe për këtë arsye do të kemi uljen e temperaturave, por jo shumë të theksuara.
Dominimi ciklonik do të jetë shumë i fortë sidomos të Enjten, kurse të Premten cikloni do të dobësohet dhe do të zhvendoset në lindje dhe juglindje, megjithatë ende priten rrebeshe lokale shiu me vetëtima dhe bubullimë sidomos në Kosovë
Cikloni do të humb përfundimisht ndikimin e tij të shtunën duke u shpërberë plotësisht, prandaj pritet përmirësim dhe stabilizim i motit. Ardhja e masës stabile anticiklonike në fundjavë do të shoqërohet me rritjen e menjëhershme dhe solide të temperaturave, por në fillim të Korrikut fronte të reja nga Evropa qendrore me origjinë nga Atlantiku do të shkaktojnë detabilizime të reja atmosferike./MeteoBallkan
