Cikloni i fuqishëm nga Atlantiku përmes Italisë do të zhvendoset nesër në drejtim të Gadishullit Ballkanik duke kushtëzuar rrebeshe të fuqishme shiu dhe shira të rrëmbyeshëm në Dalmaci të Kroacisë, Hercegovinë dhe Mal të Zi.
Dalmacia e Kroacisë dhe Hercegovina në Bosnjë janë rajone të goditura nga thatësira të gjata dhe ekstreme.
Rrebeshet e shiut do të jenë mjaft të fuqishme dhe intensive në këto vende duke përfshirë edhe Italinë ku priten stuhi të fuqishme dhe shtrëngata me breshër dhe vërshime.
Cikloni pritet të përfshijë edhe Shqipërinë, Kosovën dhe Maqedoninë Veriore, megjithatë reshjet të mëdha nuk priten për shkak të maleve të larta të cilat do të pengojnë depërtimin e masave të lagshta ajrore në kuadër të këtij cikloni. Sidoqoftë ne do të përjetojmë erëra vende-vende të fuqishme por nuk pritet asgjë ekstreme.
Reshje intensive shiu mund të ketë në veri dhe veriperëndim të Shqipërisë, kurse të shtunën reshjet e shiut do të zhvendosen në jug të vendit. Mesditën dhe pasditen e së shtunës rrebeshe lokale shiu me vetëtima, bubullimë dhe mundësi për breshër priten në shumë pjesë të Shqipërisë. Më së pakti reshje priten në ekstremin perëndimor të vendit. Edhe Kosova do të përfitojë pak reshje nga ky ciklon, megjithatë priten reshje lokale, kurse të shtunën pasdite priten rrebeshe të izoluara shiu me vetëtima dhe bubullimë./Meteoballkan
