Siç po shihet në fotografinë kryesore në veriun e Italisë tani kemi ciklonin e fuqishëm sekondar të krijuar pas trysnisë së Atlantikut. Presioni i ajrit ka rënë dukshëm nën vlerat normale, ndërsa në juglindje të Evropës kemi presionin e lartë atmosferike. Ky dallim i madh i presionit të ajrit po shkakton erëra të cilat do të intensifikohen në disa rajone.
Cikloni po ashtu është mjaft i pasur me lagështirë dhe do të na sjellë reshje të reja shiu. Vende-vende priten reshje mjaft intensive shiu si dhe rrebeshe të fuqishme shiu me vetëtima dhe bubullimë.
Pas kalimit të këtij cikloni radhën do të ketë fronti i fuqishëm i ftohtë ajrore nga veriu dhe veriperëndimi. Pas frontit nga Skandinavia do të fillojë rritja e presionit atmosferik në drejtim të rajonit tonë, ndërsa cikloni do të rrugëtojë në lindje. Kjo është situata ideale sinoptike ku i hapet rrugë ajrit të acartë siberik për të ardhur tek ne.
Ajri i acartë siberik nuk do të duhej të nënvlerësohet kur të kemi para sysh se reshje bore priten edhe në shumë vende në Shqipërinë mesdhetare. Qytetet si Lushnja, Fieri, Vlora dhe Tirana ka shumë probabilitet të kenë reshje dëbore bile edhe shtresa në disa zona. Reshje të dendura bore priten në shumë pjesë në qendër të Shqipërisë, pastaj në lindje dhe juglindje. Po ashtu edhe shumë zona në Maqedoninë Veriore do të kenë dimër të vërtetë.
Dimri i acartë do të pushtojë edhe Kosovën, por reshjet e dëborës nuk do të jenë të mëdha njëherë për njëherë./Meteoballkan