Temperatura më të ulëta me origjinë polare që erdhën dhe vazhdojnë të vijnë nga lindja dhe verilindja kanë përfshirë Republikën e Kosovë dhe vendet në rajon dhe kohëve të fundit kjo është një fenomen pak më i rrallë, pra na ma ka marrë malli për ta parë ngjyrën e kaltër që simbolizon ajrin e ftohtë edhe nëpër modelet kompjuterike.
Megjithatë, kjo masë e ftohtë ajrore do të largohet nga territoret tona diten e diele dhe do të kemi ndryshime drastike në rrymimet ajrore të cilat do të jenë nga jugu dhe do të ndikojnë drejpërdrejt në rritjen e ndjeshme të temperaturave.
Sot dhe nesër do të kemi ende nganjëherë reshje të herëpashershme bore, nganjëherë edhe në formë të rrebesheve të borës, ndërsa reshje më të dendura shiu e bore priten në jug dhe lindje të Shqipërisë si dhe në perëndim dhe jugperëndim të Maqedonisë së Veriut.
Ngjyra e kaltër që tregon temperatura të ulëta do të qëndrojë me ne deri të dielen por nuk pritet ndonjë i ftohtë i madh.
Temperaturat do të rriten për disa arsye e një prej tyre zhvillimi i cikloneve të fuqishme në Skandinavi, pastaj nga Atlantiku në veriperëndim dhe perëndim të Evropes, e nga aty në Mesdhe. Kjo do të inicoje rrymime të fuqishme të ngrohta ajrore nga Mesdheu në drejtim të viseve tona që fillojnë të dielën dhe largojnë ajrin e ftohtë.
Sidoqoftë ata që presim reshje atmosferike duhet të gëzohen sepse ato nuk do të mungojnë sidomos me afrimin e këtyre cikloneve mjaft të fuqishme nga Evropa dhe Mesdheu që sipas të gjitha gjasave do të krijohen kushte për depërtimin e sistemeve shumë të fuqishme frontale nga veriperëndimi me reshje të dendura shiu e bore dhe kjo pritet të ndodhë kur të afrohet data 20 Nëntor.
Sinoptika është jashtëzakonisht interesante për këtë periudhë sepse në Evropen perëndimore dhe qendrore do të kemi dimër të vërtetë dhe lokalisht reshje të dendura bore dhe mbetet të shihet se si këto do të reflektojnë në Ballkan sepse tani është herët për një parashikim preciz. Sipas të gjitha gjasave edhe në viset tona do të kemi depërtime të fronteve mjaft të fuqishme dhe shumë të pasura me lagështi. Të paktën këtë opsion e indikojnë pothuajse të gjitha modelet nga tani dhe ky është një sinjal shumë i fortë nga i cili është krijuar trend. Mbetet të shihet gjatë ditëve të ardhshme./MeteoBallkan
