Krijimi i një cikloni në veri të Detit Adriatik nesër do të shkaktojë destabilizim të madh të motit në Ballkan, duke kushtëzuar erëra të fuqishme, dhe reshje intensive shiu me vetëtima dhe bubullimë.
Përderisa në disa shtete ky destabilizim do të karakterizohet edhe me reshje të mëdha shiu, në territoret tona do të jenë erërat karakteristikë kryesore e këtijë përkeqësimi të motit. Edhe te ne priten stuhi të izoluara, por jo gjithëpërfshirëse, ngase reshjet kryesore pritet të ndodhin që nga Sllovenia, Kroacia, Bosnja dhe Hercegovina, Mali e Zi dhe veriu i Serbisë. Stuhi të izoluara priten edhe në veri të Shqipërisë, perëndim të Kosovës dhe viset tjera të Serbisë.
Stuhitë më të fuqishme me mundësi edhe për struktura tornadike priten në Bosnjë dhe Hercegovinë, Mal të Zi dhe Kroaci duke mos përjashtuar edhe Serbinë.
Cikloni do të rrugëtojë nga veriu i Adriatikut, në drejtim të Vojvodinës dhe Hungarisë dhe gjatë këtij rrugëtimi ky ciklon do të tërheqë masa edhe më të nxehta ajrore nga Mesdheu dhe Afrika Veriore. Për këtë arsye erërat e nesërme në Kosovë do të jenë të nxehta me efekt “fenirimi”. Erërat pritet të jenë mjaft të fuqishme, por jo të barabarta në tërë territorin. Në disa vise sidomos në viset malore ato pritet të arrijnë shpejtësinë maksimale deri në 70-75 km/h dhe të shpresojmë se e tëra do të kalojë shpejtë dhe pa dëme. Në mbrëmje erërat pritet të qetësohen. Në perëndim të Kosovës mund të kete edhe rrebeshe shiu, lokalisht edhe në vise tjera pritet ndonjë ose stuhi ose ndonjë rrebesh i izoluar. Në mbrëmje qendra ciklonike do të jetë larg diku në Ukrainë dhe Poloni, prandaj pritet që erërat të qetësohen dhe njëkohësisht një masë ajrore më e freskët do të depërtojë në rajon nga veriperëndimi duke na sjellur freskimin e shumëpritur pas vapes së madhe afrikane.
Të premtën na pret mot shumë më i këndshëm dhe me temperatura makismale nën 30 gradë Celsius në viset tona kontinentale. Priten edhe rrebeshe lokale shiu me vetëtima dhe bubullimë, por vapa e fortë afrikane rikthehet përsëri sidomos të dielën./Meteoballkan
