Temperaturat janë rritur ndjeshëm sot në rajonin tonë, por njëkohësisht kemi destabilizim të pjesërishëm të atmosferës. Deri në këto çaste atmosfera është destabilizuar në Shqipërinë juglindore, pjesë të Shqipërisë jugore, qendrore dhe lindore. Disa formacione të vranësirave me bubullima gjenden thellë në verilindje të Kosovës, ndërsa rrebeshe lokale kemi edhe në perëndim të Maqedonisë së Veriut.
Natyra e këtyre reshjeve është krejtësisht verore, pra kemi të bëjmë me zhvillime vertikale të cilat japin reshje të lokalizuara. Në ato rajone ku ka zhvillime rrebeshet mund të jenë intensive, ndërsa jo shumë larg tajonin ku nuk ka zhvillime nuk as një pikë shiu. Rrebeshet më së shumti përqëndrohen në viset kodrinore-malore.
Gjatë orëve të ardhshme pritet destabilizim i pjesërishëm edhe në Kosovë, por nuk priten reshje gjithëpërfshirëse ose shumë të përhapura.
Ngjashëm pritet të jetë edhe ditëve të ardhshme. Përpos intervaleve kohore me diell dhe rritjes së temperaturave, pasditeve dhe mbrëmjeve priten zhvillime lokale të cilat sjellin rrebeshe lokale shiu me vetëtima, bubullimë dhe mundësi edhe për breshër.
Pra, ditëve të ardhshme na pret mot i ngrohtë, por jo-stabil, me zhvillime kryesisht pasditeve dhe mbrëmjeve të vranësirave të shiut të cilat kushtëzojnë rrebeshe të izoluara por të fuqishme shiu me vetëtima dhe bubullimë. Përderisa një rajon përfiton rrebesh shiu, rajoni tjetër jo shumë larg përfiton vetëm ndonjë rigë ose asnjë pikë dhe kur ka zhvillim konvektiv është e pamundur të parashikohet rajoni i saktë se ku pritet të jetë ai zhvillim./Meteoballkan
