Sot dhe nesër në territoret e Kosovës, Shqipërisë dhe rajonit më gjerë pritet të kemi mot kryesisht me diell dhe temperatura verore nga 25 deri në 31°C.
Të premtën pasdite vonë priten zhvillime vetëm në disa zona të izoluara, ndërsa të shtunë sipas të gjitha gjasave pritet të kemi destabilizim të fuqishëm të atmosferës.
Ardhja e një sasie të ajrit të ftohtë dhe jo-stabil dhe në kontakt me ajrin e nxehtë në rajonin tonë mund të krijojë procese të bujshme atmosferike siç janë zhvillime e fuqishme konvektive ose vertikale të vranërave të cilat vende-vende pritet të kushtëzojnë shtrëngata të fuqishme shiu me vetëtima dhe bubullimë.
Reshjet e së shtunës nuk do të jenë të balancuara, prandaj disa rajone përfitojnë rrebeshe të fuqishme brenda një kohe të shkurtër, ndërsa rajone tjera përfitojnë më pak reshje. Ka mundësi që në disa vise reshjet të jenë simbolike, por në përgjithësi kësaj radhe priten rrebeshe shumë më të përhapura.
Rrebeshe të fuqishme priten në Kosovë, Mal të Zi, Kosoven Lindore, Maqedoninë Veriore dhe gati të gjitha viset kontinentale të Shqipërisë.
Në disa vise mund të krijohen shtrëngata të fuqishme me rrebeshe intensive dhe breshër sidomos në disa vise të Kosoves dhe Maqedonisë së Veriut./MeteoBallkan