Dy persona kanë vdekur të enjten në Shqipëri, si pasojë e motit të keq me reshje shiu dhe shkarkime rrufesh.
Një 51-vjeçar në fshatin Dedaj të Shkrelit ka mbetur i vdekur, pasi rrufeja ka goditur banesën e tij. Ai fillimisht është dërguar në spitalin e Shkodrës për shkak të lëndimeve që ka marrë, por nuk ka arritur t’u mbijetojë plagëve.
Viktima e dytë është gjetur në ujërat pranë portit të Vlorës, njoftoi TCh të enjten.
Ai është një 74-vjeçar dhe ende nuk është zbuluar arsyeja se si është rrëmbyer nga dallgët e detit. Trupi i viktimës është nxjerrë nga policia kufitare e Vlorës.
Moti i keq me shtrëngata ka goditur edhe pjesë të tjera të Shqipërisë. Lumi i Lanës në Tiranë ka dalë nga shtrati.
