Së pari dëshirojmë që ta kuptoni se nuk do të ndodhë diçka e jashtëzakonshme. Nuk ka asgjë të jashtëzakonshme dhe se të gjitha kanë ndodhur edhe përpara. Po e ndjejmë obligim të sqarojmë këtë pikë për shkak të shumë pyetjeve dhe keqkuptimeve nga shumë lexues, megjithatë paralajmërimet meteorologjike ekzistojnë në çdo shtet të globit dhe normalisht kur ka procese të bujshme atmosferike kujdesi kurr nuk është i tepërt.
Faqja më e madhe meteorologjike amerikane Accuweather ka potencuar faktin e mundësisë së stuhive në rajonin tonë dhe linja e stuhive do të shtrihet që nga Franca jugore e deri në Detin e Zi në lindje, pra një linjë mjaft impresive ku do të ndodhë përplasja e ajrit të nxehtë Afrikan dhe ajrit të ftohtë dhe të lagësht Atlantik.
Siç mund ta shihni edhe në foto në Kosovë, shumë pjesë të Shqipërisë, Maqedoninë e Veriut, Mal të Zi, Bullgari etj ka potencial për zhvillimin e stuhive të fuqishme të martën dhe të mërkurën. Stuhitë e fuqishme edhe nëse ndodhin nuk zgjasin shumë por në ato momente duhet patur kujdes. Kjo nuk do të thotë se do të ketë stuhi me përmasa të mëdha dhe të papara por të gjitha do të jenë brenda kornizave normale meteorologjike, edhe pse vende-vende në disa momente duhet patur shumë kujdes dhe mund të ketë edhe vërshime. Të shpresojmë se e gjitha do të kalojë edhe më lehtë se paralajmërimet tona dhe të faqes së famshme amerikane dhe nuk do të ketë kurrfar problemesh, megjithatë apelojmë edhe për kujdes të shtuar në rast të erërave dhe vetëtimave të fuqishme./Meteoballkan
