Instituti Evropian eksperimental për studimin dhe monitorimin e stuhive verore ESTOFEX ka shënjuar Republikën e Kosovës me numrin 2 e që nënkupton se mund të ndodhin stuhi potencialisht mjaft të fuqishme me shi të rrëmbyeshëm dhe breshër masiv dhe me madhësi të madhe.
Stuhi ose shtrëngata me breshër që shoqërohen me erëra të fuqishme priten edhe në Shqipëri dhe Maqedoninë Veriore dhe këtë e kemi lajmëruar në shumë postime tona për shumë ditë me radhë, por shënjimi nga Estofex nënkupton që probabiliteti për stuhi të fuqishme është jashtëzakonisht i lartë.
Kjo nuk do të thotë me siguri 100% se stuhitë e mëdha do të ndodhin dhe do të kapin terrene të mëdha, por kjo nënkupton që probabiliteti dhe parametrat janë të lartë, megjithatë mund të konkludojmë se rrebeshet intensive të shiut janë të pashmangshme sidomos në Republikën e Kosovës, shumë pjesë të Shqipërisë dhe Maqedonisë së Veriut duke pas para sysh frontin e ftohtë dhe zhvendosjen e masave ajrore shumë të paqëndrueshme e që sollën shumë probleme në vendet fqinje, madje shkaktuan dëme shumë të mëdha materiale.
Të shpresojmë që sistemet e stuhive të vijnë në viset tona më të dobësuara duke sjellur vetëm reshje shiu, por kjo mbetet të shihet.
Fronti i ftohtë ajror me destabilizim masiv të atmosferës pritet të arrijë në viset tona më vonë duke sjellur rrebeshe lokalisht intensive shiu me vetëtima, bubullimë dhe mundësi për breshër. Mund të krijohen edhe disa shtrëngata mjaft të fuqishme lokale me erëra të fuqishme të cilat nuk zgjasin aq shumë por kujdesi duhet të jetë në nivele shumë të larta./MeteoBallkan
