Edhe këtë fundjavë do të jemi dëshmitar të motit stabil, me mëngjese mjaft të freskëta dhe me mundësi për mjegull dhe vranësira të ulëta për shkak të inversionit të temperaturave, ditë të ngrohta për këtë periudhë kohore dhe pa gjasa për reshje atmosferike. Kjo për shkak të fushës së fuqishme ajrore anticiklonike.
Kjo fushë ajrore anticiklonike parashihet të dobësohet ditën e hënë kur do të fillojnë të fryjnë erëra nga jugu të cilat do të na lajmërojnë për afrimin e fronteve të lagështa dhe masave ajrore ciklonike me origjinë nga Atlantiku.
Pra edhe ky vikend do të karakterizohet me mot të pandryshueshëm, mjegull gjatë natës dhe në mëngjes si dhe mundësi për vranësira të ulëta vende-vende (kryesisht nëpër lugina). Gjatë ditës në shumë rajone do të ketë shpërbërje të mjegullës eventuale dhe pritet ti kemi disa orë me mot mjaft të këndshëm me rreze diellore dhe temperatura të ngrohta, ndërsa nëpër disa lugina ka gjasa që mjegulla dhe vranësirat e ulëta të qëndrojnë për një kohë pak më të gjatë, ndërsa rreze më të shumta diellore do të kenë viset kodrinore-malore.
Gjatë javës së ardhshme na pret mot mjaft dinamik dhe me reshje të herëpashershme atmosferike, shi nëpër ultësira dhe pritet që viset kodrinore-malore të kenë edhe reshje bore./Meteoballkan