Masa mjaft të ftohta polare po mbretërojnë sonte në rajonin tonë veçanërisht në Kosovë ku temperaturat po pësojnë ulje të mëtutjeshme. Në fotografinë kryesore shihen temperaturat e regjistruara rreth një orë më parë, ndërsa në fotografinë brenda tekstit shihen ndjesia subjektive të të ftohtit ose siç quhet në gjuhën angleze “Windchill”.
Gjatë natës në Kosovë temperaturat do të sillën nga minus 4 nëpër ultësira deri në -12 ose -13 në viset malore afër Malit të Zi. Ndjesia subjektive e të ftohtit do të jetë edhe më e lartë për shkak të erërave të akullta veriore.
Sidoqoftë edhe ky i ftohtë polar do të jetë afatshkurtër sepse nga nesër do të fillojë ngritja e temperaturave, ndërsa ditëve të ardhshme priten ngritje të mëtutjeshme të temperaturave dhe reshje të herëpashershme shiu, bore e shqote.
Pra, përpos natës së sontme rreziku për acar të fortë nuk do të ekzistojë më në rajonin tonë edhe për shumë ditë ndoshta edhe javë, megjithatë ende gjendemi në mes të dimrit dhe ngritja e temperaturave që pritet nuk do të thotë se dimri ka shkuar përfundimisht./Meteoballkan
