Temperaturat kanë pësuar ulje të ndjeshme dhe bora e djeshme krijoi edhe shtresa dekorative në shumë pjesë të Kosovës, por shumë rajone tjera mbeten pa reshje bore sidomos Dukagjini dhe lokalisht disa vise tjera.
Fronti i djeshëm u largua me shpejtësi, ndërsa sot kemi një ciklon të ri i cili nga Mesdheu po vjen drejt territoreve tona. Cikloni nga Mesdheu do të kushtëzojë rritje të shpejtë të temperaturave, por mbetjet e ajrit të ftohtë polar do të qëndrojnë edhe sonte në Kosovë dhe për këtë arsye fillimi i reshjeve sonte mund të kushtëzojë reshje të dendura bore në shumë pjesë të Kosovës. Reshje kalimtare bore sonte mund të paraqiten edhe në shumë zona të Dukagjinit, pra e tëra varet nga temperatura në momentin e ardhjes së reshjeve.
Sidoqoftë, edhe nëse do të ketë reshje bore ato do të shndërrohen në reshje shiu ngase ma depërtimin e mëtutjeshëm të ciklonit së bashku me të do të ketë rritje të temperaturave për shkak të rrymimeve të fuqishme nga jugu.
Pra, sonte gjatë natës në shumë pjesë të Kosovës reshje kalimtare bore, vende-vende mund të ketë reshje të dendura kalimtare bore, pastaj nëpër ultësira fillimisht reshjet eventuale të borës do të shndërrohen në reshje shiu. Nesër do të ketë rritje të temperaturave dhe pasdite ose në mbrëmje do të ketë vetëm reshje shiu në tërë territorin e Republikës së Kosovës.