Ndikimi i ciklonit të fuqishëm të shtresave të larta atmosferike i cili është prezent mbi rajonin tonë disa ditë më radhë do të vazhdojë edhe sot. Pasiqë kemi ngritje të lehtë të temperaturave kjo do të ndikojë në fuqizimin e sistemeve të stuhive lokale të cilat priten në disa rajone. Në nivel rajonal atmosfera sot është jashtëzakonisht jostabile dhe ka shumë stuhi të izoluara mbi Gadishullin Ballkanik duke filluar nga Kroacia, Bosna dhe Serbia ku vende-vende ka edhe breshër.
Rebeshe të izoluara ka edhe në disa vende në Kosovë të cilat në orët e ardhshme do të shpeshtohen dhe fuqizohen, megjithatë nuk do të jenë gjithëpërfshirëse por të karakterit lokal. Priten rrebeshe lokalisht të fuqishme shiu me vetëtima dhe bubullimë si dhe do të ketë mundësi edhe për breshër.
Cikloni edhe sot do të jetë i fuqishëm, ndërsa nesër do të dobësohet dukshëm dhe në këtë mënyrë rrebeshet nga nesër do të jenë më të rralla dhe më të izoluara. Gjithashtu do të kemi edhe ngritje të temperaturave. Vera do të “kap” situatën në dorë nga pasnesër kur pritet të kemi mot me shumë diell dhe temperatura verore./Meteoballkan
