Masat e fuqishme ciklonike më në fund po tërhiqen nga rajoni ynë gradualisht, por edhe sot mbeten vranësirat dhe rigat lokale të shiut. Masat ciklonike të bllokuara për një kohë shumë të gjatë do të dëbohen nga një anticiklon që do të na sigurojë disa ditë mjaft të ngrohta. Ky anticiklon së bashku me një fushë mjaft të ngrohtë termike nga jugperëndimi gjegjësisht direkt nga Afrika Veriore do të kushtëzojnë një javë verore me shumë diell dhe temperatura të larta.
Duke pas parasysh se në tokë ka lagështi shumë të madhe dhe ajri do të jetë i dendur (me lagështi të lartë relative) ka shumë gjasa që i nxehti të jetë shumë i rëndë për tu përjetuar.
Sidoqoftë, pasditeve dhe mbrëmjeve të së martës dhe së mërkurës nuk përjashtohet mundësia që në disa vise kryesisht malore të ketë zhvillime të ndonjë rrebeshi të izoluar me vetëtimë.
Të enjten dhe të premten priten rritje të mëtutjeshme të temperaturave ku ajo maksimale pritet të arrijë dhe tejkalojë 30 gradë Ceslius. Siç e theksuam më lartë i nxehti pritet të përjetohet rëndë për shkak të lagështisë së ajrit që do të na bëjë të ndjejmë zagushi.
Sipas ecurive aktuale sinoptike përkeqësim dhe destabilizim të atmosferës pritet të kemi të shtunën pasdite me rrebeshe lokalisht intensive shiu me vetëtima dhe bubullimë./METEOBALLKAN
