Pas mbizotërimit mjaft të gjatë të rrymimeve të fuqishme ajrore nga jugu këtë dimër më në fund po shihet fundi i kësaj “epoke” të jugut. Por në fund jugu mund të na jap një goditje të mirë para se veriu të marrë frenat në dorë.
Me këtë nënkuptojmë atë që kemi thënë se sot do të kemi erëra vende-vende të fuqishme nga jugu (jo në tërë territorin) sidomos në viset kodrinore-malore. Ky “tranzicion” i rrymimeve ajrore jug/veri do të shoqërohet me një super ciklon i cili na vjen nga Italia veriore dhe i cili na sjell edhe reshje të dendura shiu dhe i cili duket qartë në fotografinë kryesore dhe duket aq bukur.
Atmosfera është aq dinamike këto ditë dhe ditëve të ardhshme sa që nganjëherë nuk po dimë se çfarë të postojmë së pari, sidoqoftë ti kthehemi seriozitetit. Edhe sot me temperatura pranverore. Nga nesër do të fillojnë të depërtojnë temperatura mjaft të ulëta me origjinë kontinentale nga Siberia. E kemi fjalën për Kosovën fillimisht.
Gjatë fundjavës një ciklon tjetër diku afër jugut të Italisë do të tërheqë ajrin e ftohtë thellë edhe në viset mesdhetare të Shqipërisë duke kushtëzuar reshje dëbore. Ajri i ftohtë siberik do të arrijë deri në Egjipt në Afrikën veriore.
Pra, pas një dominimi mjaft të gjatë të erërave të ngrohta nga jugu, tani radhën e ka dominimi i plotë i erërave të akullta nga veriu/verilindja/veriperëndimi në rajonin tonë dhe ky dominim do të jetë për ditë të tëra./Meteoballkan
