Vala e motit të keq që këto ditë ka përfshirë Evropën ka marrë 7 jetë njerëzish në Itali. Stuhitë, shiu, erërat e forta, baticat e larta kanë krijuar një kaos të vërtetë. Megjithatë, gjendja më e keqe paraqitet në Venecia ku uji arriti një nivel rekord, njofton MeteoBallkan. Restorantet dhe banesat u përmbytën dhe shumë shkolla u mbyllën për shkak të stuhive.
Përveç Venecias, gjendje e jashtëzakonshme u shpall për pothuajse të gjithë Italinë: alarmi i kuq në veri (Liguria, Lombardia, Veneto, Friuli dhe Trentino) dhe Abruzzo dhe portokalli në shumicën e pjesës tjetër të gadishullit dhe Sicilisë. Nga ana tjetër, Alpet në veri të Italisë dje,u mbuluan nga një shtresë e trashë e borës.
Stuhitë dhe erërat e fuqishme me reshje të mëdha shiu shkaktuan probleme të mëdha edhe në pjesë të krahinës austriake të Karintisë dhe Tirolit. Lumenjtë kanë arritur në nivele rekorde të ujit prandaj shumë vendbanime u evakuuan.
Autoritetet kompetente në këtë pjesë të Austrisë kanë ftuar qytetarët që për shkak të stuhive të mos dalin nga shtëpia pa nevojë.
Stuhi të fuqishme kishte gjithashtu edhe në Kroaci ku në zonën e Savudrisë të hënën pasdite, dy të rinj që shkuan për surfing konsiderohen të zhdukur.
