Në aspektin e presionit atmosferik e tërë kjo javë do të jetë një “luftë” mes masave ajrore gjigande ciklonike nga Britania e Madhe dhe anticiklonit të fuqishëm Rus. Rajoni ynë shpeshherë gjatë kësaj jave do të jetë një “fushëbetejë” mes këtyre dy masave gjigande ajrore.
Në aspektin termodinamik jemi në mesin e goditjes së dytë polare mbi rajonin tonë dhe sonte do të jetë kulmi i të ftohtit polar ,e temperatura nën 0 në shumicën e territoreve tona kontinentale. Gjatë natës dhe mëngjesit në Kosovë do të jetë mjaft ftohtë dhe në nëpër luginat e Kosovës do të ketë kushte edhe për krijimin e mjegullës. Pas kalimit të frontit të ftohtë ajror tani jemi nën ndikimin e masave të reja të thata anticiklonike.
Sot dhe nesër (e hënë, e martë) do të jetë ftohtë veçanërisht gjatë netëve dhe mëngjeseve kurse nga mërkura na pret ngritje graduale e temperaturave për shkak të depërtimit të masave të ngrohta ajrore nga Mesdheu si pasojë e masave ajrore të forta ciklonike të cilat nga Atlantiku do të depërtojnë në Evropë dhe Mesdhe (Itali).
Nga e enjta do të fillojnë edhe reshjet sporadike të shiut për Kosovë dhe Maqedoninë Veriore, ndërsa reshje pak më të shpeshta shiu priten në Shqipëri dhe Mal të Zi. Në viset larta malore priten reshje bore.
Edhe fundjava na pret me mot të ngjashëm, me ngritje të mëtutjeshme të temperaturave, intervale kohore diellore, erëra jugore, vranësira dhe here pas here edhe reshje shiu, më intensive në Shqipëri.
Bora e cila ra dje në mbrëmje dhe mëngjesin e sotëm dhe na solli sadopak gëzim dhe entuziazëm, nuk pritet më të ketë në një të ardhme të afërt, por ky është vetëm fillimi i dimrit dhe sigurisht se do të kemi goditje tjera polare gjatë këtij dimri të cilat do të na sjellin reshje të dendura bore./Meteoballkan