Në shumë vise kontinentale të Shqipërisë atmosfera është aktivizuar kaherë ku ka zhvillime të izoluara por të fuqishme konvektive, me rrebeshe dhe stuhi të izoluara.
Këto zhvillime janë tipike pranverore dhe verore ku lokalisht ka rrebeshe mjaft intensive, ndërsa në zona të afërta nuk ka fare reshje. Atmosfera pritet të destabilizohet edhe në Kosovë gjatë orëve të ardhshme.
Me aktivizimin e atmosferës presim rrebeshe lokale shiu me vetëtima, bubullimë dhe mundësi për breshër. Vende-vende mund të ketë rrebeshe mjaft intensive shiu me shkarkime të fuqishme elektrike.
Reshjet do të jenë të karakterit lokal, pra disa rajone përfitojnë rrebeshe mjaft intensive, ndërsa rajone tjera më pak reshje. Në disa vise rrebeshet nuk do të ndodhin fare siç ndodhë shpeshherë në këto raste.
Rrebeshe lokalisht intensive parashihen edhe në shumë vise të Maqedonisë së Veriut, Malit të Zi dhe Luginës së Preshevës.
Gjatë kohës së stuhisë rekomandohet që të keni kujdes të shtuar veçanërisht në komunikacion dhe ambientet e hapura. Zakonisht stuhitë e forta nuk zgjasin shumë dhe kalojnë shpejtë, por mund të ndodhë që ndonjë rrebesh i fortë të zgjasë shumë për shkak të rrymimeve të dobëta ajrore lartë në atmosferë./METEOBALLKAN
