Ashtu siç kemi paralajmëruar shumë ditë më herët ka filluar depërtimi i ajrit të ftohtë polar dhe erëra e ftohta veriore dhe verilindore. Reshjet atmosferike përsëri do të jenë simbolike dhe jo të kënaqshme nga ky front i ftohtë, por gjatë natës dhe mëngjesit të hershëm në shumë pjesë të Republikës së Kosovës priten reshje kryesisht të dobëta bore, ose fjolla të herëpashershme bore.
Gjatë ditës së nesërme moti do të fillojë të kthjellohet, por do të jetë mjaft ftohte dhe nata mes së hënës dhe së martës do të jetë me acar dhe mundësi edhe për mjegull.
Nga e mërkura ajri i ftohtë polar do të fillojë që gradualisht të largohet nga rajoni ynë dhe masa më të ngrohta ajrore nga Mesdheu do të mbretërojnë përsëri tek ne. Po ashtu nga e mërkura ose e enjta do të kemi edhe reshje të herëpashershme shiu dhe bore në viset malore, ndërsa për fundjavë na pret mot i ngrohtë për këtë periudhë kohore me mundësi për reshje të herëpashershme shiu./Meteoballkan
