Një pilot britanik i një linje ajrore doli me një mënyrë të pazakontë për të kaluar kohën gjatë një fluturimi provë. Ai përdori itinerarin e fluturimit për të “shkruar” mesazhin “Jam mërzitur” në radarin mbi një grykëderdhje në kufirin Angli-Uells.
Mesazhi i tij u regjistrua nga faqja e internetit e gjurmimit të fluturimeve Flightradar24. Të dhënat tregojnë se avioni i Ravenair u nis nga Liverpooli në orën 11:25 të mëngjesit të së shtunës. Gjatë fluturimit dy-orësh, ai fluturoi mbi Wirral, Cheshire, Uellsin e Veriut dhe Dee Estuary, ku mesazhi ishte qartë i dukshëm në hartën e fluturimit.
Piloti gjurmoi shtatë shkronja mbi det midis Talacre dhe Greenfield me kthesa të sakta dhe të mprehta për rreth 20 minuta. “Nuk kam parë kurrë një pilot të shkruajë sa i mërzitur është, duke e vizatuar atë në qiell”, tha Aaron Rheins, krijuesi i përmbajtjes së gjurmimit të fluturimit në TikTok.
Sipas Flightradar24, mesazhi u hartua në një lartësi prej rreth 335 metrash. Ravenair shpjegoi se piloti, një instruktor fluturimi në të njëzetat, po fluturonte me një avion Piper Tomahawk gjatë një fluturimi provë pasi kishte zëvendësuar një pjesë të avionit.
Drejtori operativ i kompanisë, Wayne Barrett, la të kuptohej se piloti nuk do të përballej me pasoja dhe vlerësoi aftësitë e tij të fluturimit. “Mendoj se piloti ishte pak kurioz, ose më saktë, pak i mërzitur sepse ishte vetëm një fluturim provë. Duhet të them se ishte një fluturim mjaft i aftë”, i tha ai BBC-së.
“Ai nuk u fut në telashe, por e gjithë historia mori shumë vëmendje”, shtoi Barrett.
Ai konfirmoi se fluturimi ishte i nevojshëm për të testuar një pjesë të re të instaluar në aeroplan, megjithëse rruga që ndiqte piloti nuk ishte miratuar. “Mendoj se një cilindër u zëvendësua. Pas një zëvendësimi të tillë, ne kryejmë një fluturim prove për t’u siguruar që gjithçka është në rregull”, theksoi ai.
Pavarësisht mesazhit që shkroi në hartën e fluturimit, Barrett beson se piloti duhet të ketë qenë plotësisht i përqendruar gjatë gjithë kohës. “Ai mund të ketë qenë pak i mërzitur, por për të shkruar ato fjalë, duhej të ishte shumë i përqendruar, kështu që nuk ishte aspak duarkryq”, përfundoi ai
