Një vorbullë e ajrit ekstrem të nxehtë nga Afrika Veriore do të depërtojë në Spanjë. Nga Spanja pastaj do të përfshijë edhe Francën, Gjermaninë, Italinë, Zvicrën, Anglinë, shtetet e Beneluksit dhe pjesë të Evropës qendrore. Autoritet franceze janë në gjendje të lartë gatishmërie dhe të alarmuara posaçërisht kur kujtojnë valën vdekjeprurëse të vitit 2003 kur patën vdekur dhjetëra mijëra francezë nga goditja e të nxehtit afrikan.
Temperaturat do të kulmojnë dhe do të arrijnë deri në 40 gradë celsius, lokalisht edhe më nxehtë dhe kur llogarisim lagështinë e ajrit në Evropë vetëm mund të imagjinojmë se si do të kalojnë ata. Përderisa Evropa perëndimore, veriperëndimore dhe qendrore do të goditen nga vala ekstreme e nxehtësisë ne do të jemi nën ndikimin e masave më të freskëta ajrore që vijnë nga veriu i kontinentit. Priten ulje-ngirtje të shpeshta temperaturash tek ne por për momentin nuk pritet agjë ekstreme./Meteoballkan
