Temperaturat janë mjaft të larta sot në rajon, kurse nga veriu dhe verilindja e Kontinentit evropian është duke ardhur fronti i ftohtë ajror i cili në kontakt me temperaturat e larta do të shkaktojë destabilizim të fuqishëm të atmosferës në disa rajone të Sllovenisë, Kroacisë, Bosnjës, Serbisë, Rumanisë etj. Priten erëra të fuqishme veriore dhe rrebeshe të izoluara por të fuqishme shiu me vetëtima, bubullimë dhe breshër. Pra, fjala është për shtetet e lartëpërmedura.
Në Kosovë, Maqedoninë e Veriut dhe Shqipëri fronti do të arrijë nesër paradite, por bazuar në imazhet satelitore nuk priten reshje me ndonjë përjashtim. Megjithatë në disa rajone nuk duhet përjashtuar mundësia që të ketë ndonjë rigë apo rrebesh afatshkurtër shiu gjatë mëngjesit të nesërm edhe në Kosovë. Gjasa më të mëdha për ndonjë rrebesh shiu me vetëtima dhe bubullimë nesër kanë disa rajone të Maqedonisë së veriut dhe juglindja e Shqipërisë.
Priten ulje të temperaturave si rezultat i erërave veriore dhe verilindore dhe kjo do të hetohet në viset kontinentale e shumë pak do të ndjehet në viset bregdetare./Meteoballkan
