Sipas ecurive aktuale sinoptike fundin e këtij viti dhe fillimin e vitit të Ri do ta përcjellim me mot relativisht të ftohtë dhe me reshje të dobëta bore. Anticikloni i fuqishëm Evropian do të tërhiqet në perëndim drejt Britanisë së Madhe dhe Atlantikut, pastaj do të bashkohet me Anticiklonin e Grenlandës, kurse nga Evropa lindore dhe verilindore në drejtim të Gadishullit Ballkanik do të vazhdojnë të depërtojnë masa të ftohta ajrore nga Siberia.
Pasiqë ky parashikim është afatgjatë ndryshimet mund të ndodhin, por kjo është situata sinoptike se si e “shohin” modelet nga tani. Pothuajse shumica e modeleve kanë simulime identike, ndërsa ky i ftohtë do të jetë një “garancë” për vazhdimin e surprizave të bardha dimërore gjatë fillimit të Janarit. Duke pasur parasysh se këto temperatura do të qëndrojnë mbi rajonin tonë pas Vitit të Ri pritet të kemi kundërreagimin e Mesdheut i cili do të krijonte disa ciklogjeneza dhe në kontakt me ajrin e ftohtë Siberik do të kishim reshje të dendura bore. Ne do të jemi këtu për ta përcjellur situatën sinoptike, por sipas ecurive aktuale kjo situatë do të jetë mjaft interesante dhe me karakteristika të vërteta dimërore. Sidoqoftë të theksojmë edhe një herë për tju ikur keqkuptimeve nga lexuesit tanë të nderuar se ky parashikim nuk është 100% i saktë, sepse bëhet fjalë për një javë e më tepër, por kjo është ajo çka modelet “shohin” tani për atë periudhë. Për çdo ndryshim eventual do të lajmëroheni me kohë në Meteoballkan.com. Meteoballkan.
