Sot në drejtim të Evropës ka depërtuar masa e ftohtë ajrore me origjinë polare. Njëkohësisht në Britaninë e Madhe kemi anticiklonin i cili po shtrihet në drejtim të Evropës paralelisht ciklonit. Nga veriu kemi depërtimin direkt të ajrit të ftohtë polar i cili po shkakton edhe reshje bore. Reshjet e borës kanë përfshirë shtetet Skandinave, pastaj pjesë të Gjermanisë, Francës, Zvicrës, Polonisë etj.
Në anën tjetër kemi krijimin e një cikloni të fuqishëm në Gjirin e Gjenovës në Italinë Veriore dhe ky ciklon do të sjellë reshje të dendura shiu dhe bore ditëve të ardhshme Gadishullit Ballkanik. Reshjet e shiut veç kanë filluar të depërtojnë nga Deti Adriatik në drejtim të Sllovenisë, Kroacisë, Bosnë dhe Hercegovinës, kurse në vazhdim të ditës reshjet e shiut do të përfshijnë edhe Malin e Zi, Shqipërinë, Maqedoninë dhe në mbrëmje edhe Kosovën.
Me uljen e temperaturave në pjesë të Sllovenisë, Kroacisë, Bosnës dhe Malit të Zi nesër do të fillojnë edhe reshje të dendura bore, kurse pasnesër vonë reshje bore priten edhe në visset kodrinore-malore në Kosovë, pjesërisht edhe në Shqipëri dhe Maqedoninë Veriore. Pra, gradualisht rajoni ynë po hyn në një periudhë me mot mjaft jostabil dhe të paqëndrueshëm. Reshjet nuk do të jenë barabartë të distribuuara sepse disa rajone do të përfitojnë reshje të mëdha atmosferike, kurse disa rajone më pak, megjithëse kësaj radhe do të ketë reshje edhe në ato vende ku mbretëron një thatësi e madhe prej shumë kohësh. Në nivel rajonal përpos reshjeve të shiut priten edhe rrebeshe të fuqishme lokale me vetëtima, bubullimë dhe breshër.
Cikloni po lëviz gradualisht nga veriperëndimi dhe perëndimi në drejtim të lindjes dhe juglindjes dhe kësaj radhe do të ketë reshje shiu pothuajse në tërë territorin e Shqipërisë, Kosovës dhe Maqedonisë së Veriut. Informacione dhe detaje tjera gjatë ditës dhe mbrëmjes në meteoballkan.com./Meteoballkan
