Masa mjaft të ftohta nga Atlantiku verior kanë mbërthyer shumicën e territorit të Evropës verilindore, lindore dhe pjesë të Evropës juglindore ku gjendemi edhe ne. Si pasojë në shtresat e larta të atmosferës mbi këto territore kemi krijimin dhe dominimin e vazhdueshëm të masave ajrore mjaft jo stabile ciklonike.
Ky ciklon vazhdimisht po “rrotullohet” në hapësira të njëjta gjeografike pra mbi Evropën lindore, verilindore dhe tek ne. Kjo vjen si pasojë e dobësimit të përkohshëm të rrethit polar i cili pastaj dërgon sasi të mëdha të ajrit mjaft të ftohtë dhe jo stabil. Gjatë muajve të verës rrethi polar fuqizohet dhe në këtë mënyrë ajri i ftohtë ngujohet në kuadër të këtij rrethi apo vorbulle të përhershme ciklonike polare.
Këto masa të ftohta kanë shtrirje mjaft të gjerë dhe në këtë mënyrë po pamundësojnë depërtimin e masave të nxehta nga Afrika Veriore dhe kjo gjendje sinoptike pritet të vazhdojë edhe ditëve të ardhshme, të paktën deri afër 3 ose 4 Qershorit kur ka tendencë për stabilizim të përkohshëm të motit dhe ngritje të temperaturave.
Sidoqoftë mbi rajonin tonë sot dhe ditëve të ardhme na pret mot mjaft jo stabil, me intervale kohore me diell, vranësira të shpeshta të cilat herë pas here dhe vende-vende po kushtëzojnë reshje shiu si dhe rrebeshe lokale me vetëtima dhe bubullimë. Çdo ngritje e temperaturave ditore këto ditë do të ishte sikur ti hedhësh benzinë zjarrit sepse kjo do ti jepte energji shtesë formimit të vranësirave vertikale të cilat kushtëzojnë rrebeshe të fuqishme shiu me vetëtima, bubullimë dhe po ashtu edhe breshër. prandaj duhet llogaritur edhe në breshër dhe erëra të forta në disa rajone orëve të pasdites dhe mbrëmjeve. Reshjet do të jenë të karakterit lokal dhe nuk pritet të zgjasin aq shumë sidomos kur janë të intensitetit të lartë. Normalisht do të kemi edhe periudha relativisht të gjata pa reshje por në përgjithësi kushtet sinoptike ditëve të ardhshme do të jenë mjaft të paqëndrueshme.
Stabilizim i përkohshëm i motit dhe ngritje e theksuar e temperaturave do të ketë gjasa të kemi nga data 3 ose 4 Qershor, por edhe kjo ende nuk është shumë e sigurtë dhe ndryshime mund të ndodhin fare lehtë. Ne do tu njoftojmë për çdo ndryshim eventual./Meteoballkan
