Rajoni ynë po largohet nga ndikimi anticiklonik gradualisht. Anticikloni i fuqishëm tani gjendet larg në territorin e Turqisë, ndërkohë që cikloni gjigand me qendër mes Skandinavisë dhe Britanisë së Madhe po fillon të ndikojë ne rajonin tonë duke ngritur temperaturat dhe duke kushtëzuar lokalisht erëra jugore dhe jugperëndimore. Vende-vende pati edhe riga afatshkurta shiu.
Cikloni gjigand mes Skandinavisë dhe Britanisë së Madhe do të mbizotërojë, ndërkohë masat e fuqishme anticiklonike po ndërlidhen mes vete që nga Azoret afër Portugalisë, mes përmes Afrikës Veriore e deri në Turqi, Iran dhe Turkmenistan. Cikloni me trysninë e tij drejt Mesdheut do të kushtëzojë krijimin e ciklonit dytësor diku në Italinë Veriore. Ky ciklon me sistemet e tij frontale do të sjellë reshje të reja atmosferike në rajonin tonë vende-vende priten reshje të dendura shiu sidomos në Shqipëri. Fjala është për fundjavë. Pas kalimit të këtij cikloni në Italinë Veriore do të kemi krijimin e një cikloni të ri sekondar të dilelen i cili përsëri do të na sjellë reshje atmosferike, vende-vende intensive sidomos në Shqipëri, por lokalisht edhe në Dukagjin.
Pra duke analizuar meteorologjikisht para nesh kemi tri ose katër ciklone që do të ndikojnë në motin mbi rajonin tonë duke na sjell porcione të shpeshta të reshjeve të shiut fillimisht të cilat në Shqipëri pritet të shkaktojnë përmbytje të reja. Në Kosovë njëherë për njëherë nuk parashihet ndonjë rrezik për reshje shumë të forta, por nuk duhet nënvlerësuar potencialin e reshjeve sidomos në disa vise të Dukagjinit.
Dy ciklonet e para do të na sjellin kryesisht reshje shiu, në viset malore reshje bore. Ajo çfarë është jashtëzakonisht interesante është cikloni i tretë (diku kah e marta) i cili në kombinim me ajrin e ftohtë polar mund të na sjell reshje të dendura bore në fillim të javës tjetër. Nëse nuk do të kemi ndryshime të mëdha në gjendjen sinoptike atëherë na presin reshje të dendura bore në Kosovë, Maqedoninë Veriore dhe disa pjesë të Shqipërisë dhe Malit të Zi si dhe ulje të ndjeshme të temperaturave. Kësaj radhe nëse nuk ka ndryshime trashësia e borës do të arrijë rreth 20 cm. edhe nëpër ultësirat e Kosovës, por prapë duhet të theksojmë se ndryshimet ende janë të mundshme dhe çdo ndryshim mund të determinojë edhe sasinë e reshjeve, mund të zvogëlojë ose eventualisht edhe të rris sasinë e reshjeve, prandaj ne do të jemi duke e përcjellur situatën sinoptike dhe do ju njoftojmë në postimet tona të përditshme./Meteoballkan
