Ciklonet e Mesdheut të cilat sollën reshje të fuqishme atmosferike gjatë ditëve të kaluara më në fund kanë pushuar dhe tani janë zëvendësuar nga masa të fuqishme ajrore anticiklonike. Rrymimet ajrore vazhdojnë të jenë nga veriu për shkak të gjendjes së favorshme sinoptike dhe kjo pritet të vazhdojë edhe gjatë ditëve të ardhshme me tendencë të fuqizimit të mëtutjeshëm të rrymimeve ajrore të ftohta nga veriu.
Ky Dhjetor për dallim nga shumë Dhjetor të viteve të kaluara kur kishim mot kryesisht të ngrohtë dhe me dominim të plotë të rrymimeve ajrore nga jugu, tani kemi të kundërtën dhe kjo është një shenjë se ky dimër për dallim nga dimrat e kaluar ka potencial të më të madh.
Faktor kryesor për këto rrymime të ftohta ajrore është blloku i fuqishëm anticiklonik i krijuar në Atlantik jo shumë larg Britanisë së Madhe. Ky bllok anticiklonik ngadalëson qarkullimin e masave të ngrohta ajrore nga Atlantiku në drejtim të Evropes dhe rajonit tonë dhe njëkohësisht mundëson drejtimin e masave të ftohta ajrore me origjinë polare të cilat tani janë grumbulluar masivisht në Rusi dhe Siberi. Me hapjen e një korridori ajror mundësuar nga kjo gjendje sinoptike në evoluim e sipër, nga Siberia mund të kemi ardhjen e të ftohtit ruso/siberik në Evropë dhe rajonin tonë gajtë fundit të këtij viti dhe fillimit të vitit të Ri.
Sidoqoftë për këtë flasim në postime tjera dhe sot po fokusohemi për ditët në vijim. Mot i ngjashëm sikurse sot pritet edhe nesër me një rritje të lehtë të temperaturave. Ka mundësi që të ketë edhe reshje të pakta lokale në formë të rigave të shiut nëpër ultësira dhe bore në viset kodrinore-malore. Në Shqipëri nuk priten reshje.
Gjatë fundjavës një fluks i ajrit të ftohtë nga Rusia pritet të arrijë tek ne në kuadër të anticiklonit të madh që e përmendëm më lartë. Pak para ardhjes së këtij fronti priten rritje të lehta të temperaturave, por me kalimit e frontit priten ulje të temperaturave dhe reshje të reja bore. Nuk priten reshje të mëdha bore dhe po ashtu edhe kjo borë nuk do të jetë gjithëpërfshirëse. Temperaturat pritet të ulen edhe më shumë dhe ndjesia e të fohtit pritet të jetë e fortë për shkak të erërave të ftohta veriore (windchill).
Pra, Dhjetori ka nisur ashtu siç edhe duhet në fillim të dimrit klimatologjik dhe bazuar në ecuritë aktuale sinoptike ky dimër ka potencial të jetë mjaft i ftohtë dhe me shumë borë. Ekzistojnë gjasa reale që festat e këtij fundiviti ti presim me borë dhe acar, por për këtë ende nuk duhet të japim konkluzione para kohe, ngase ndryshime gjithsesi se pritet të ketë, sidoqoftë potencial të madh ka në të gjitha modelet dhe ky potencial nuk shihet shpeshherë./MeteoBallkan