Evropa perëndimore sot është përfshirë nga një valë nxehtësie e cila për disa rajone do të jetë afatshkurtër. Temperaturat maksimale në Gadishullin Iberik sot kanë arritur deri në 35 gradë celsius, ndërsa në Rusinë Jugore temperatura ka arritur deri në 38 gradë celsius. Mbi 30 gradë celsius sot ishte në shumë pjesë të Francës dhe në disa pjesë të Gjermanisë dhe Italisë veriore. Ndërkohë një ciklon i fuqishëm do ti afrohet sot Irlandës dhe në përgjithësi Britanisë së Madhe duke shkaktuar uljen e temperaturave. Fronti i ftohtë nga ky ciklon do të përfshijë më vonë edhe shumë pjesë tjera të Evropës dhe për këtë arsye priten ulje të temperaturave.
Në Gadishullin Ballkanik kemi ciklonin e shtresave të larta atmosferike (Upper Low) të stacionuar në Detin Jon. Ky ciklon po shkakton kaos në disa pjesë të Ballkanit e më së shumti në Rumani, por nuk kanë shpëtuar lehtë as Bosna dhe Hercegovina dhe pjesë të Shqipërisë, Bullgarisë, Maqedonisë, Malit të Zi dhe Serbisë.
Në orët e ardhshme reshje intensive shiu dhe rrebeshe me vetëtima dhe bubullimë priten në Kosovë, pjesë të Shqipërisë dhe Maqedonisë së Veriut./Meteoballkan
