“Mbetjet” e ciklonit ende janë prezent në Kosovë dhe kjo dallohet me vranësirat të cilat na vijnë nga verilindja, kurse kthjellimi do të vije nga perëndimi dhe veriu për shkak të afrimit të anticiklonit pikërisht nga ato anë. Përndryshe moti tani është kthjelluar në Bosnjë dhe shumë pjesë të Serbisë pas reshje dhe përmbytjeve masive atje. Ky kthjellim do të shtrihet gradualisht edhe në Kosovë. Gjithashtu do të kemi edhe ngritje të temperaturave dhe rreze stabile diellore. Nuk duhet përjashtuar në tërësi ndonjë zhvillim të vranësirave të cilat mund të sjellin ndonjë rigë apo rrebesh afatshkurtër shiu kryesisht në viset kodrinore-malore. Presioni i ajrit është u duke u ngritur dhe kjo është një shenjë e qartë e stabilizim dhe përmirësimit të motit në Kosovë. Temperaturat do të shënojnë ngritje të ndjeshme dhe për vikend ato maksimale mund të arrijnë deri në 30 gradë Celsius në nivel vendi dhe për shkak të zagushisë i nxehti mund të jetë pak i rëndë.
Sa i përket Shqipërisë dhe Maqedonisë së veriut atje priten rrebeshe të lokalizuara shiu me vetëtima dhe bubullimë sidomos gjatë pasditës së enjte me intensitet të shtuat në juglindje të Shqipërisë, por edhe në jug, qendër dhe lindje të vendit si dhe në perëndim të Maqedonisë së Veriut.
Pra, pas reshjeve intensive në Kosovë të cilat ishin jashtëzakonisht të mirëseardhura, pason stabilizim i motit dhe ngritja e theksuar e temperaturave, megjithatë gjatë fundjavës moti nuk do të jetë tërësisht stabil për shkak se priten zhvillime të vranësirave pasditeve të cilat mund të kushtëzojnë rrebeshe të izoluara shiu me vetëtima dhe bubullimë kryesisht në viset kodrinore-malore. Temperaturat e larta mund të shkaktojë edhe ndonjë stuhi të izoluar e cila mund të prodhojë edhe breshër./Meteoballkan