Nën ndikimin anticiklonik nesër (e diele) pritet një ditë e këndshme pranverore, megjithatë parashihen disa vranësira dhe rrallë në disa vise edhe ndonjë rigë ose rrebesh i shkurtër shiu.
Sot kemi intervale të gjata kohore me diell, por në disa vise ka zhvillime konvektive të cilat pak më të shpeshta do të jenë orëve të vonshme të pasdites, megjithëse mbesin të izoluara. Zhvillime të forta konvektive ka në disa rajone të Shqipërisë dhe Maqedonisë së Veriut.
Të hënën një ciklon i fuqishëm në Skandinavi zbret me frontin e tij deri në viset tona duke shkaktuar destabilizim të atmosferës me rrebeshe lokale shiu me vetëtima dhe bubullimë. Reshjet do të jenë tipike verore, përderisa një rajon përfiton rrebesh të fuqishëm, rajoni tjetër përfiton shumë pak ose hiç fare.
Të martën dhe të mërkurën reshjet dhe rrebeshet e shiut parashihen të jenë më të përhapura dhe më të shpeshta, ku nganjëherë priten reshje intensive. Temperaturat shënojnë ulje të mërkurën dhe të enjtën për shkak të depërtimit të një mase të ftohtë ajrore e shoqëruar me erëra mjaft të freskëta nga veriu.
Sipas ecurive aktuale sinoptike nga e premta ka gjasa që të kemi përmirësim më afatgjatë të motit, por kjo mbetet të shihet.
Detaje tjera në postimet tona të ardhshme./METEOBALLKAN
