Nga veriperëndimi i Evropës janë shtrirë masa të fuqishme ajrore anticiklonike edhe në rajonin tonë duke larguar reshjet dhe vranësirat. Masat e thata antciklonike gjenden rreth Britanisë së Madhe në kuadër të një sistemi të fuqishëm ajror me presion të lartë atmosferik (anticiklon), ndërsa masat ajrore ciklonike gjenden thellë në veri dhe lindje të Evropes, gjegjësisht thellë në Atlantikun verior, Skandinavi dhe Rusi ku priten stuhi të fuqishme dimërore me reshje intensive bore. Stuhitë më të mëdha dimërore me reshje mjaft të dendura bore ditëve të ardhshme priten pikërisht në territorin rus për shkak të këtyre cikloneve, por reshje të dendura bore priten edhe në shumë pjesë të Skandinavisë dhe në Turqi. Në Antali dhe Alanya priten reshje mjaft të fuqishme shiu dhe stuhi me vetëtima dhe bubullimë.
Rajoni ynë është shumë larg këtyre zhvillimeve, por ditëve të ardhshme priten disa (të paktënn dy) fronte të ftohta ajrore në kuadër të këtyre cikloneve, me reshje simbolike, ngase reshjet në rajonin tonë pritet të pengohen nga anticikloni i fuqishëm evropian.
Gjatë dekadës së fundit të Janarit ka gjasa që anticikloni i fuqishëm britanik të zhvendoset pak më tutje drejt Atlantikut, me ç”rast do të hapeshin rrugët për ciklone të reja nga Atlantiku ose Skandinavia drejt Alpeve dhe pastaj në drejtim të Italisë dhe eventualisht me ndonjë ciklongjeneze në Detin Adriatik ose Jon mund të kemi reshje të reja bore , por kjo mbetet vetëm një opsion ose parashikim i paqëndrueshëm afatgjatë. Reshje të reja të mëdha bore për momentin nuk pritet të kemi./MeteoBallkan
