Pas kalimit të frontit të natës së kaluar i cili kushtëzoi erëra mesatare deri të forta kalimtare dhe riga shiu e fjolla sporadike bore, sot moti u kthjellua krejtësisht për shkak të dominimit të plotë anticiklonik.
Fronti ishte në kuadër të cikloneve të fuqishme thellë në lindje dhe veri të Evropës dhe ndikimi i tij ishte simbolik, por pritet të ndikojë në uljen e temperaturave sonte gjatë natës. Temperaturat minimale gjatë natës dhe mëngjesit të nesërm pritet të luhaten nga – 4 deri në -8 nëpër ultësira dhe pritet të jetë edhe më ftohtë në viset malore. Të mërkurën na pret mot plotësisht i ngjashëm sikurse sot me një dallim që nuk priten erëra.
Të enjtën kreshta anticiklonike depërton thellë në rajon, por vetëm shkurtimisht e në anën tjetër nga veriu niset fronti i fuqishëm i ftohtë ajror në drejtim të rajonit tonë. Si pasojë afatshkurtër e këtyre zhvillimeve do të kemi rrijte të ndjeshme të temperaturave dhe fuqizim të përkohshëm të erërave jugore dhe jugperëndimore.
Gjatë natës në të premtën fronti arrin në Kosovë, me erëra mesatare deri të forta nga veriu dhe me reshje bore. Temperaturat shënojnë ulje të ndjeshme dhe rikthehemi në disponimin e vërtëtë dimëror. Edhe pse nuk priten reshje të mëdha bore, prapëseprapë pritet të kemi krijimin e shtresave të borës në shumicën e territorit të Republikës së Kosovës duke përfshirë edhe shumicën e territorit të Dukagjinit. Reshjet më të dendura të borës priten në viset kodrinore-malore të rajonit e posaqërisht në malet dhe kufirin mes Shqipërisë, Malit të Zi, Kosovës dhe Maqedonisë së Veriut. Reshje bore priten edhe në ultësira të Kosovës, veriut të Malit të Zi dhe shumë ultësira të Maqedonisë së Veriut. Po ashtu edhe ultësirat e Shqipërisë në lindje, veri dhe juglindje të vendit pritet të zbardhen. Fjolla bore mund të ketë edhe në rajone ku reshjet e borës janë dukuri e rrallë në Shqipëri e më së shumti gjasa ka në veriperëndim të vendit.
Me ardhjen e ajrit të ftohtë polar mund të ketë edhe ndonjë “surprizë” me fjolla bore në jug dhe qendër të Shqipërisë, por kjo mbetet ende mjaft diskutabile./MeteoBallkan