Mbi Ishujt Britanik është krijuar një sistem e fuqishëm ajror me presion të lartë atmosferik (Anticiklon), kurse në Evropën lindore një tjetër sistem i fuqishëm me presion të ulët atmosferik (ciklon). Në këtë mënyrë nga Evropa Veriore është hapur rruga për depërtimin e masave të fuqishme të ftohta ajrore në drejtim të rajonit tonë. Dallimi i madh në presionin atmosferik dhe në temperatura do të shkaktojë erëra të fuqishme veriore dhe lindore në rajonin tonë, por nuk duhet shqetësuar sepse nuk ka asgjë ekstreme. Erërat e fuqishme veriore do të sjellin edhe masat e ftohta ajrore dhe të akullta me origjinë polare.
Në Detin Jon do të krijohet edhe një ciklogjenezë e cila shërben si infuzion për depërtimin e mëtutjeshëm të masave ajrore të ftohta në drejtim të rajonit tonë. Në këtë mënyrë sonte pritet fuqizimi i erërave veriore në Kosovë dhe lindore në Shqipëri. Priten edhe reshje shiu dhe bore në Shqipëri më intensive, kurse në Kosovë më të dobëta. Reshje bore priten edhe në Maqedoni, vende – vende më intensive.
Ajri i ftohtë Siberik do të stacionohet në rajonin tonë dhe kjo nënkupton se do të qëndrojë disa ditë. Pra, ditëve të ardhshme priten ulte të theksuara të temperaturave dhe reshje të herëpashershme bore në Kosovë, Maqedoni dhe disa pjesë të Shqipërisë lindore dhe juglindore. Në pjesët tjera të Shqipërisë reshjet pritet të ndërpriten qysh nga nesër por do të jetë mjaft ftohtë./Meteoballkan.
Informacione tjera në postimet tona të ardhshme.
