Sot jemi nën ndikimin e plotë të ciklonit i cili po largohet në drejtim të Evropes lindore dhe juglindore. Cikloni solli reshje mjaft të dendura gjatë mbrëmjes së kaluar sidomos në Shqipëri dhe Dukagjin, ndërsa sot reshjet janë të karakterit lokal.
Edhe sot kemi erëra nga jugperëndimi, ndërsa nesër me largimin e ciklonit do të fillojnë të fryjnë erëra nga veriperëndimi, veriu dhe verilindja. Një valë reshjesh të reja shiu e bore në viset e larta malore priten gjatë natës dhe paradites së nesërme, por këto reshje nuk do të jenë aq intensive dhe nuk do të ndikojnë shumë te rajonet e përmbytura. Ajo që mund të ndikojë në përkeqësimin e gjendjes në rajonet e përmbytura është prurja masive e ujit pas reshjeve të ditëve të kaluara nga malet përreth dhe gjendja mund të jetë ende kritike vetëm përreth rrjedhes së lumenjve.
Nesër priten ulje kryesisht të lehta të temperaturave për shkak të rrymimeve ajrore nga veriu, por nuk priten reshje bore ende nëpër ultësira dhe pritet një ditë e vranët dhe me reshje shiu sidomos në mëngjes dhe paradite.
Gjatë ditës dhe pasdite vranësirat do të fillojnë të largohen dhe priten intervale kohore me diell sidomos në Shqipëri, por edhe në viset tjera./MeteoBallkan