Sot po mbanë mot i vranët, i freskët dhe vende-vende ka edhe reshje shiu. Në orët e pasdites dhe mbrëmjes së hershme pritet të kemi kthjellim të pjesshëm ku mund të kemi intervale kohore me diell, ndërsa po ashtu ka gjasa për ndonjë zhvillim të ndonjë rrebeshi orëve të pasdites.
Edhe në rajon ka vranësira, rrebeshe lokale shiu e intervale kohore me diell.
Pas përmirësimit afatshkurtër, qysh nesër do të kemi zhvillime të reja konvektive veçanërisht orëve të pasdites dhe mbrëmjes ku priten rrebeshe lokale me vetëtima dhe bubullimë.
Zhvendosja e një cikloni të fuqishëm nga Italia drejt Greqisë dhe Turqisë do të na sjellë vazhdimisht vranësira dhe reshje e rrebeshe shiu deri në fillim të javës së re. Kuptohet reshjet do të jenë të herëpashershme. Ende ka rrezik që disa rajone të përfitojnë sasi shumë të mëdha reshjesh dhe të rrezikohen nga përmbytjet e shpejta.
Sipas ecuriva aktuale sinoptike më në fund nga java e re do të kemi përmirësim të motit. Do të kemi shumë më shumë intervale kohore me diell dhe temperaturat do të shënojnë rritje, ndërsa se a do të kemi stabilizim të plotë të motit ende nuk mund të përcaktohet me saktësi të plotë./METEOBALLKAN