Rrufeja që goditi një pemë në bregun perëndimor të Floridës prodhoi një lloj materiali magjepsës fosforeshent që nuk është parë më parë në Tokë.
Kjo lëndë mund të përfaqësojë një grup krejtësisht të ri mineralesh që lidh hendekun midis mineraleve hapësinore dhe atyre që gjenden në planetin tonë.
Materiali, shumë i ngjashëm me fosfatin e kalciumit (CaHPO3), u gjet brenda të ashtuquajturës rrufe të petifikuar (fulgurite), e cila formohet kur një goditje rrufeje rrit temperaturën e rërës aq shumë, duke shkrirë materialin në çast. Megjithëse fulguritet janë një dukuri e zakonshme, është e rrallë të gjesh diçka kaq unike brenda tyre siç ishte rasti në Florida.
“Ne kurrë nuk e kemi parë këtë material të ndodhë natyrshëm në Tokë. Ne mund të gjejmë minerale të ngjashme në meteorite dhe hapësirë, por nuk kemi gjetur asgjë të tillë askund”, tha gjeologu Matthew Pasek nga Universiteti i Floridës Jugore.
Gjatë kësaj goditje rrufeje, karboni në pemë u dogj, si dhe hekuri që u grumbullua rreth rrënjëve, zbuluan shkencëtarët, duke krijuar këtë material të pazakontë. Kjo formë e fosfatit mund të formohet në skenarë të tjerë të ngjashëm që përfshijnë gjendje me energji të lartë dhe mund të luajë një rol të rëndësishëm në ciklin e fosforit, shkruan Science Alert.
Shkencëtarët nuk kanë mundur të krijojnë këtë formë të fosfatit të kalciumit në laborator, gjë që tregon se kërkohen kushte shumë specifike për formimin e tij. Hulumtimi ofroi gjithashtu më shumë informacion për formën dhe fuqinë e vetë rrufesë, pasi kjo nuk është hera e parë që një fenomen i tillë prodhon materiale me interes për shkencëtarët.
“Është e rëndësishme të kuptojmë se sa energji ka rrufeja sepse atëherë ne e dimë se sa dëme mund të shkaktojë një rrufe dhe sa e rrezikshme është ajo”, përfundoi Pasek.
