Para disa viteve ishte e paimagjinueshme që serbët do ta kishin në listë Shqipërinë si destinacion për të pushuar. Megjithatë, mbyllja e kufijve për shkak të pandemisë, masat kufizuese nëpër kufi, duke përfshirë edhe testet obligative negative kanë bërë që destinacionet tradicionale, si Greqia dhe Mali i Zi për serbët këtë vit të mos jenë alternativë.
Në vendkalimin kufitar në Merdare, automjetet me targa të Serbisë që kthehen nga pushimet verore në Shqipëri shpesh mund të shihen.
N1 ka realizuar një kronikë me disa qytetarë serbë që po ktheheshin nga Shqipëria derisa ata kanë thënë se janë të befasuar këndshëm si nga plazhet ashtu edhe nga mikpritja, transmeton Reporteri.
“Ne ishim me pushime në Sarandë. Ishte mirë. Ishte shumë më më mirë sesa pritëm. Njerëzit ishin shumë të sjellshëm, ushqimi, deti është i mrekullueshëm”, thotë njëri prej tyre.
Një turist tjetër, duke u kthyer nga Shqipëria, tregon se mikpritja ishte e shkëlqyeshme, si në ambientet e hotelierisë, ashtu edhe tek plazhet.
Shqipëria, turizmi i së cilës është goditur shumë nga mungesa e e turistëve tradicionalë, mirëpret pushuesit nga Serbia me “krahë të hapur”.
Shumë qytetarë të Serbisë, për shkak të terrenit të panjohur, kanë vendosur të udhëtojnë për në Shqipëri përmes Maqedonisë ose Malit të Zi.
