Rrjedhjet e gazit nga tubacionet ruse Nord Stream 1 dhe Nord Stream 2, të raportuara ditët e fundit nga autoritetet detare të Suedisë dhe Danimarkës, mund të jenë rezultat i “sabotazhit” të kryer me nëndetëset ose ekipet nëndetëse. Hipoteza është hedhur nga gazeta gjermane “Tagesspiegel”, e cila citon burime nga qeveria e Berlinit.
Stacionet e matjes sizmologjike në Suedi dhe Danimarkë regjistruan dy shpërthime të mëdha nënujore në të njëjtën zonë me rrjedhjet e gazit të hënën.
Një “emetim i madh energjie” i parë në orën 02:03 ishte me magnitudë 1.9, pastaj një tjetër në orën 19:04 me magnitudë 2.3. Zëdhënësi i ekzekutivit të BE-së, Tim McPhie, theksoi se “nuk ka asnjë ndikim në siguri”, duke saktësuar se Komisioni është informuar “për tri rrjedhje gazi, dy në Nord Stream 1 dhe një në Nord Stream 2″.
Për kryeministren daneze, Mette Frederiksen, ato ishin “akte të qëllimshme”. Rrjedhjet e gazit duhet të zgjasin “të paktën një javë”, deklaroi qeveria daneze. I pyetur nga një gazetar nëse qeveria i konsideron këto veprime si një akt lufte kundër Danimarkës, ajo u përgjigj: “Kjo ka ndodhur në ujërat ndërkombëtare, kështu që jo”.
Nga ana tjetër, Suedia ka hapur një hetim për sabotim. Kryeministrja suedeze, Magdalena Andersson, tha në një konferencë për shtyp në Stokholm se policia suedeze ka hapur një “hetim paraprak për sabotim” në rastin Nord Stream. “Ne punojmë së bashku me Danimarkën, Norvegjinë, Gjermaninë dhe SHBA-në. BE-ja është informuar,” shtoi ajo. Ministrja e Jashtme, Ann Linde, nga ana e saj tha se “ndoshta është një sabotim, por nuk spekulojmë se kush mund të jetë përgjegjës”.
Sipas BE-së, nëse ndalimi i Nord Stream është i qëllimshëm, përgjigjja do të jetë e fortë.
“Tani është thelbësore të hetohen incidentet, të kemi qartësi të plotë mbi ngjarjet dhe pse. Çdo ndërprerje e qëllimshme e infrastrukturës aktive të energjisë evropiane është e papranueshme dhe do të çojë në përgjigjen më të fortë të mundshme”. Ky është postimi i Presidentes së Komisionit Evropian, Ursula von der Leyen.
