Në fotografinë kryesore e kemi ciklonin e fuqishëm mesdhetar që tani po ikë gradualisht në drejtim të Turqisë dhe pastaj në Azi. Ishte ky ciklon që na solli hare dimërore duke mos lejuar që ky dimër të na ikë sikur dimri i vitit të kaluar me shumë pak reshje bore gjatë tërë stinës.
Cikloni i pasur me shumë lagështi i ndihmuar nga Anticikloni i fuqishëm në Atlantik afër Britanisë së Madhe tërhoqi masën e ftohtë polare ajrore dhe rrjedhimisht ende kemi reshje të dendura bore. Me largimin e ciklonit vendin e tij po e zë anticikloni i fuqishëm nga Britania, por korridori i ajrit të ftohtë nga veriu është ende i hapur dhe vazhdon të depertojë me fronte të reja të ftohta ajrore gjatë javës.
Këto fronte nuk do të sjellin reshje gjithëpërfshirëse, por herë pas here priten reshje dëbore gjatë ditës së martë dhe po ashtu edhe të mërkurën do të kemi frontin më të ri të ftohtë ajror me reshje lokale bore shkurtimisht të dendura në disa rajone. Nuk do të mungojnë edhe erërat e ftohta dhe herë pas here të fuqishme nga veriu.
Nga e enjta dominim anticiklonik, por mbetet shumë ftohtë dhe me mundësi për acar të fortë në mëngjes.
Nga e premta përmirësim gradual i motit dhe ngritje graduale e temperaturave ditore, por mëngjesi ende pritet të jetë me acar në viset tona kontinentale.
Ishin këto disa fjali për motin gjatë kësaj jave dhe nëse ka ndonjë ndryshim eventual do ju lajmërojmë në postimet tona të përditshme./Meteoballkan
