Gushti në Kosovë fillon i nxehtë dhe me diell. Temperaturat maksimale në territorin e Republikës së Kosovës pritet të lëvizin nga 31 deri në 33 gradë Celsius. Do të fryjë erë e lehtë deri mesatare drejtimesh të ndryshme.
Në Shqipëri pritet të mbajë mot me diell, stabil dhe i nxehtë. Do të ketë lëvizje të vranësirave lokale në disa zona kontinentale. Temperaturat maksimale afërsisht deri në 34 ose 35 gradë Celsius.
Në Maqedoninë Veriore, Luginën e Preshevës dhe Mal të Zi parashihet të mbajë mot stabil, me diell dhe i nxehtë. Temperaturat shënojnë rritje nga 30 deri në 25 gradë Celsius në zonat më të nxehta.
E mërkura na sjellë mot me diell, por edhe me vranësira të cilat do të kushtëzojnë ndonjë rigë kryesisht të dobët shiu në disa zona të Kosovës dhe Malit të Zi. Temperaturat nuk shënojnë ndonjë ndryshim, përveç se priten ulje të lehta në zonat ku do të ketë vranësira.
Dy ditët e fundit të javës së punës pritet të mbajë mot kryesisht me diell dhe shumë i nxehtë. Do të kemi intensifikim të vapës verore për shkak të fuqizimit të kreshtës termike nga jugperëndimi dhe njëkohësisht afrimit të frontit nga veriperëndimi dhe perëndimi i cili për fundjavë do të na sjellë reshje dhe rrebeshe kalimtare shiu në gati tërë rajonin duke përfshirë edhe bregdetin. Lokalisht priten rrebeshe intensive shiu, ndërsa temperaturat shënojnë ulje të ndjeshme. /METEOBALLKAN