Kjo javë do të jetë nën ndikimin e masave të thata anticiklonike të cilat na sigurojnë mot stabil dhe pa reshje atmosferike dhe masave të nxehta ajrore me origjinë nga Afrika Veriore. Do të jetë një javë e vërtetë verore dhe stabile posaçërisht katër ditët e para të javës ku priten temperatura maksimale nga 30 deri në 36-37 gradë celsius në nivel rajoni. Kjo vlen si për Kosovën, po ashtu edhe për Shqipërinë, Maqedoninë Veriore dhe Malin e Zi.
Të enjtën pasdite vonë në Kosovë dhe pjesët tjera kontinentale do të fillojnë të depërtojnë masa pak më të freskëta ajrore, megjithatë do të vazhdojë të mbetet mot mjaft i nxehtë.
Të premtën pasdite në disa pjesë të rajonit, kryesisht në Kosovë, Mal të Zi, Maqedoni dhe veri të Shqipërisë mund të ketë rrebeshe të izoluara shiu me vetëtima dhe bubullimë. Reshjet do të përqëndrohen kryesisht në viset kodrinore-malore. Temperaturat do të shënojnë ulje të lehta në viset kontinentale. Ngjashëm parashikohet të jetë edhe të shtunën, ndërsa të dielën rrebeshet e shiut do të shpeshtohen dhe zgjerohen, por prapëseprapë do të mbeten të karakterit lokal.
Ishte ky parashikimi i motit për javën që po hymë bazuar në ecuritë aktuale sinoptike. Nëse ka ndonjë ndryshim eventual do të njoftoheni me kohë në postimet tona të përditshme./Meteoballkan
